Mae pobl wedi bod wrthi'n astudio gwyfynod ym Mhrydain ers cannoedd o flynyddoedd, ac mae cofnodi gwyfynod yn fwy poblogaidd heddiw nag erioed. Mae Gwyfynod yn Cyfrif yn cynnig llu o ffyrdd i bobl i gymryd rhan yn y gweithgarwch cyffrous, gwerthfawr, tra phleserus hwn.

Fe all unrhywun helpu – 'does dim rhaid ichi fod yn arbenigwr. Fe gewch wneud gymaint neu cyn lleied ag y dymunwch, gan gofnodi unrhyw wyfyn neu lindysyn mwy ei faint a welwch chi, cyhyd â'ch bod yn gallu ei enwi.

Y prif gynlluniau cofnodi a weithredir gan brosiect Gwyfynod yn Cyfrif yw:

• Y Cynllun Cenedlaethol Cofnodi Gwyfynod – ein cynllun cofnodi pwysicaf oll ar gyfer cofnodi pob rhywogaeth o wyfynod mwy eu maint unrhywle yn y DU, Ynys Manaw neu Ynysoedd y Sianel.
• Noson Genedlaethol y Gwyfynod – dathliad blynyddol gwyfynod a chofnodi gwyfynod. Cofnodwch yn rhywle newydd, gwahoddwch ffrindiau a'ch teulu, neu chwiliwch am rywogaethau targed.
• Mapio ymfudwyr – arolwg ar-lein syml ar gyfer unrhywun sy'n cael golwg ar y Gwalchwyfyn Hofran rhyfeddol neu'r glöyn byw prydferth hwnnw, y Fantell Dramor, yn ystod 2009.

Dylid anfon cofnodion am wyfynod at eich Cofnodydd Gwyfynod Sirol a dylent gynnwys manylion o'r rhywogaethau a welsoch chi, sawl esiampl a welsoch chi, y dyddiad, y lleoliad, y cyfeirnod grid a'ch manylion cysylltu.